خدای پاک تر ټولو ستر ورکوونکی دی، او د هغه پیروان غواړي د هغه په څېر سخي واوسي. ابراهیم د خپلي شتمنیو لسمه برخه ورکړه. ډېری مسیحیان دا تعقیبوي او د خپلو عایداتو لسمه برخه ورکوي. پردې سربېره، هغوی نورې مرستې هم کولای شي. د ورکړې لپاره کوم خاص اصول نشته؛ دا د انسان او خدای ترمنځ اړیکه ده. موږ باید په پټه، د اخلاص څخه ډکه، او د زړه له تله صدقه ورکړو، پرته له دې چې د ثواب تمه ولرو.

عیسی مسیح وفرمایل، ”کله چې تاسو روژه نیسئ“ نو هغه د دې تمه درلوده چې شاګردان به یې روژه نیسي. عیسی په روژه کي د زړه د نیت په اهمیت ټینګار کوي، موږ ته یې ویلې دي؛ چې ځان ښوودنه مه کوئ، بلکې په پټه روژه ونیسئ. مسیحیان د شکر ایستلو، د خدای سره د نږدېوالي، او نور خاصو هدفونو لپاره روژه نیسي، لکه د خلاصون او د دعاوو د ځواب لپاره. د روژې طریقه او وخت فرد یا ډله په خپله ځان ته ټاکي. داسي خلک هم شته چي ۴۰ ورځې یې روژه نیولې او ځینو څو اونۍ، خو خدای موږ ته لارښوونه کوي چې مونږ څه وکړو، تر څو په روژه کي د هغه اراده پوره کړو.

دعا د اسماني پلار سره خبري کول دي، چي په هغې کي مونږ د خپل ځان اړتیاوي، د نورو خلکو اړتیاوي، خپلو ټولنو، هېوادونو او د نړۍ اړتیاوې خدای ته وړاندې کوو. لکه یو ماشوم چې خپل پلار ته ورتلای شي، موږ هم هر وخت، هر ځای او په هره ژبه دعا کولی شو. موږ ته اړتیا نشته چې د دعا لپاره ځانګړی ځای، وخت یا لباس ولرو، بلکې موږ کولی شو هماغسې چې یو، خدای ته ورشو او د عیسی په نوم دعا وکړو. موږ یواځې هم دعا کولی شو او له نورو سره یو ځای هم، او زموږ دعاوې لنډې یا اوږدې هم کېدای شي.

یوه ودانۍ هم کیدای شي چې کلیسا وبلل شي، خو ریښتینې کلیسا د مسیح بدن دی. کلیسا په مسیح د ایمان لرونکو خلکو ټولنه او د خدای ژوندۍ کورنۍ ده. کلیسا په نړۍ کې د ټولو نسلونو لپاره د مسیح په هکله د شاهدۍ ورکولو لپاره شتون لري. مسیح او د هغه کلیسا د مېړه او مېرمنې په مثال دي، چې په هغه کې کلیسا د مسیح ناوې بلل کېږي.

خدای پاک په خپل ذات او ماهیت کې یو دی. خو هغه په درې بېلابېلو شخصیتونو کې څرګند شوی دی، کوم چې په دوامداره توګه د یو بل سره تعامل کوي. دوی یوځای موجود او تلپاتي دي، خو بېلابېل کردارونه لري. پلار خدای او روح القدس په زوړ تړون کې څرګند شوي دي، او عیسی په نوي تړون کې د خدای د زوی، د خدای د کلام او مسیح په توګه څرګند شوی دی. همدارنګه په کلام کي داسي ډیر آیتونه شته، چې دا درې واړه شخصیتونه یو ځای ذکر کوي.

روح القدس د تثلیث درېیم شخص دی، کوم چې په پیدایښت کې فعال ؤ. روح القدس موږ ته د مسیح لپاره د شهادت ورکولو ځواک راکوي. په زوړ تړون کې، روح القدس پر پېغمبرانو او مقدسو کسانو نازل شو او هغوی ته یې الهام ورکاوه چې نبوت وکړي او د خدای لپاره لوی کارونه ترسره کړي. مسیح د خپلو پیروانو سره ژمنه وکړه، چې روح القدس به د هغه په پيروانو کې د یو مرسته کوونکي په توګه ژوند وکړي، تر څو هغو ته مشوره، زده کړه او لارښوونه وکړي. دا وعده په هغه ورځ پوره شوه، کله چې شاګردانو ته د پنتیکاست په ورځ د روح القدس په وسیله د تعمید غسل ورکړل شو.

ټولو انسانانو ګناه کړې ده او د خدای له معیار څخه کوم چې د هغه سپیڅلتوب دی، پاتې راغلي دي. د ګناه پای مرګ دی، او مونږ که هر څه وکړو خو خپل ځان نشو ژغورلی. خدای زموږ لپاره عیسی د قربانۍ په توګه راولیږه. که چیرې موږ په دې ایمان ولرو چې عیسی زموږ لپاره په شخصي توګه مړ شوی دی، نو بیا په عیسی مسیح کي ایمان موږ ته نجات راکوي او بله هېڅ لار نشته.

خدای پاک د نړۍ سره دومره مینه وکړه، چې خپل زوی یې راولیږلو. د خدای زوی نړۍ ته د دې لپاره راغی، تر څو ورک شوي کسان پیداکړي او ویې وژغوري. هغه زموږ ګناهونه په صلیب باندې د ځان سره واخیستل او زموږ په ځای مړ شو، ترڅو مونږ وبخښل شو. د نجات یوازنۍ لار دا ده، چې مونږ په دې ایمان ولرو چي عیسی مسیح زمونږ لپاره خپل ځان قربان کړ.

عیسی مسیح یوازینی کامل انسان ؤ، چا چې هیڅ ګناه نه وکړه او نه یې د خدای د ارادې خلاف کوم کار وکړ. هغه د خدای مقدس زوی ؤ او همدارنګه د انسان کامل زوی ؤ. یوازي هغه کولای شول چي خپل ځان زموږ د ګناهونو لپاره د کاملي قربانۍ په توګه وړاندې کړي

فریسیانو د عیسی څخه حسد کاوه ځکه چې هغه د خلکو په منځ کې ډیر محبوب ؤ، او هغوی پلان جوړ کړ چې هغه ووژني. په دې به هم خبري کوو، چي عیسی ولې د خپلو دښمنانو پر وړاندې جګړه ونه کړه؟ شاګردان نه پوهېدل چې ولې باید عیسی مړ شي. یهودا د عیسی سره خیانت وکړ او پطروس یې د پيژندلو څخه انکار وکړ. همدارنګه عیسی خپلو پیروانو سره د روح القدس د رالیږلو ژمنه وکړه.

خدای پاک د یو مسیحا ژمنه وکړه او عیسی مسیح د مریم څخه وزیږید، چا ته چي ویل شوي ؤ چې هغه به څومره ستر وي. کله چي هغه غټ شو، نو هغه خلکو ته وعظ کول شروع کړل او معجزې به یې ښوودلې. همدارنګه یې د خپل ځان لپاره دولس شاګردان غوره کړل تر څو د هغه پیروي وکړي.

د مقدس کتاب (بایبل) دوهمه برخه نوی تړون دی، کوم چي د متی، مرقوس، لوقا او یوحنا په ۴ انجیلونو سره پيلیږي. ورپسي د رسولانو عملونو کتاب او د پولوس رسول ۱۳ لیکونه دي. د دې پس نور دیارلس لیکونه دي او په پای کي د مکاشفې کتاب دی.

سپیڅلی کلام دوې برخې لري، زوړ تړون او نوی تړون. زوړ تړون په ۳۹ کتابونو مشتمل دی، په کوم کي چې لومړي ۵ کتابونه هم شامل دي، کوم چي د موسی د قانون په نوم یادیږي. همدارنګه په زوړ تړون کي د لویو پیغمبرانو او کوچنیو پیغمبرانو کتابونه هم شامل دي، همدارنګه د زبور شریف، متلونو او ځیني نور تاریخي کتابونه هم په زوړ تړون کي دي.

عیسی مسیح خپل رسولان وګومارل، کوم چې عام کسان وو، تر څو د نړۍ ټولو قومونو ته د زیري پیغام ورسوي. د خدای فرښتې هغه روحونه دي، چې د نجات وارثانو ته د خدمت کولو لپاره رالیږل شوي وې. شیطان او د هغه فرښتې، چې اوس شیطاني روحونه دي، هڅه کوي چې خلک تباه کړي او د خدای پاک کار له منځه یوسي.

په دې خپرونه کې به تاسو اورئ، چې سپیڅلی کلام د انبیاوو په هکله څه فرماېې او مسیحي سپیڅلي کتابونه او لیکونه د کومو رسولانو په وسیله لیکل شوي دې. ایا نبیان بې ګناه وه او کنه؟ او یا دا، چې ایا دوی ټول یوازې د اسراییلو قوم ته رالیږل شوي وو؟

په دې خپرونه کې به تاسو د ګناه تعریف او فطرت زده کړئ. او دا چي سپیڅلی کلام د ګناه په هکله څه فرمايي؟ او دا چې انسان لومړنۍ ګناه کله او څنګه وکړه؟ او بیا خدای انسان ته څه ډول سزا ورکړه. او که یو څوک په ګناه اخته وې نو هغه کس ته څه کول پکار دې؟ او په پای کې مو د ځینو هغه عملونو یادونه هم کړې ده، چې هغه ګناه ګڼل کیږي.

د انسان د پېدایښت په هکله د سمې عقیدې درلودل دومره ضروري دي، لکه څومره چې د خدای په هکله د سمو مالوماتو درلودل ضروري دي. تاسو به زده کړئ، چې مسیحیان د انسان د پېدایښت په هکله څه نظر لري؟ او همدارنګه خدای پاک لومړنی انسان څنګه پیداکړ او دا چې انسان څنګه او ولې د خدای له امر څخه سرغړونه وکړه او بیا خدای پاک انسان ته څه ډول سزا ورکړه؟

مسیحیان د خدای په هکله څه عقیده لري؟ او د دوی لپاره خدای څوک دی؟ همدارنګه به مونږ تاسو سره د خدای د ذات په هکله خبرې کوو. کله چې مونږ وایو چې خدای وینې او اورې نو ایا خدای پاک هم د انسان په څیر بدن او جوړښت لرې؟ خدای پاک خپله مینه څه ډول مونږ ته څرګندوې؟ مسیحیان ولې خدای ته پلار یا اسمانې پلار واېې؟